Azərbaycanda mübarizlik simvolu kimi tanınan, mərd və mübariz vətən oğlu Tofiq Yaqublu heç bir səbəb göstərilmədən 4 aydır həbs edilib. O, cinayət törətdiyinə görə deyil, hakimiyyətdə olan insanlardan fərqli olaraq, vicdanlı, düz danışan, millətin, xalqın mənafeyini Əliyev rejimindən qoruduğuna görə həbs olunub.
4 aydır heç bir araşdırma aparılmayıb və diktatura rejimi indi də Tofiq bəyin həbs müddətini uzatmaq istəyir.
Tofiq Yaqublu Əliyev rejiminin açıq tənqidçisi olduğu üçün ömrünün çox hissəsini son 25 ildə həbsdə keçirib. Tofiq Yaqublu və digər siyasi məhbuslar rejim repressiyalarından çox əziyyət çəkirlər. Ölkə daxilində ardıcıl həbslər davam edir. Təəssüflər olsun ki, Tofiq bəy hələ də həbsdədir, çünki Azərbaycanda qanunu və ədaləti qorumağa hesablanmış qanuni orqanlar yalan istehsalı üçün konveyerə çevriliblər. Ötən 25 ildə hakimiyyət Tofiq bəyi uydurma, saxta, ssenari əsasında o qədər həbs edib ki, indi onun adı təkcə ölkədə deyil, xaricdə də çox yaxşı tanınır. Tofiq müəllimin azadlığını tələb edən tək biz deyilik, bütün sivil dünya hüquq və azadlıqları müdafiə edən qurumlar və fərdlərdir.
T.Yaqublu külli miqdarda ziyan vurmaqla dələduzluq etmə, rəsmi sənədləri, blankları saxtalaşdırma, qanunsuz hazırlama və ya satma maddələri ilə 4 ay əvvəl həbs edilib. Kim Əliyev rejimini hansısa ittihamla tənqid edirsə, ölkə başçısı bu tənqidçiləri elə bu maddə ilə həbs etdirir.
İlham Əliyev günahsız insanlara böhtan atmaqda, rəqabət apara bilmədiyi insanların əl-qolunu qandallamaqda çox mahirdir. Biz bunun həmişə şahidi olmuşuq. Tofiq bəyin, mübariz bir insan olduğunu görən rüşvətxor məmurlara himayədarlıq edən rejim başçıları da onun mübariz, igid olduğunu görüb, yenidən onu şərləyib həbs etdilər. Çünki vicdanlı, prinsipial insanlar İlham Əliyev rejiminin düşmənləridir. Tofiq Yaqublunu tanıyan hər kəs bilir ki, o, cinayətkar deyil. Gəlin susmayaq. Tofiq bəyə və bütün siyasi məhbuslara azadlıq tələb edək.
Rəsul Ə.
Comments
Post a Comment