Azərbaycan hakimiyyəti repressiyaya o qədər öyrəşib ki, aksiya zamanı qaldırılan plakatları hazırlayan şəxsi həbs etməkdən belə çəkinməyib.
Gədəbəy rayonunun Söyüdlü kəndində yerli sakinlərin etiraz aksiyası zamanı qaldırdıqları plakatları hazırlayan Coşqun Musayevin cinayət işi üzrə məhkəmə prosesi başa çatıb. Coşqun Musayev 3 il müddətinə azadlıqdan məhrum edilib. Avqustun 7-də Bakı Ağır Cinayətlər Məhkəməsində ona hökm oxunub. Eldar İsmayılovun sədrliyi ilə keçirilən hökmə əsasən, Coşqun Musayev 3 il müddətinə azadlıqdan məhrum edilib.
Coşqun Musayev 2023-cü ilin iyununda həbs edildikdən sonra ona qarşı Cinayət Məcəlləsinin 234.4.3-cü maddəsi - satış məqsədi ilə narkotik vasitələri əldə etmə və ya saxlama ilə bağlı ittiham irəli sürülüb. Maraqlıdır ki, Coşqun Musayev plakatlara görə polis bölməsinə aparıldıqdan sonra onun üzərindən narkotik “tapılıb”. İttihama görə, Mütəşəkkil Cinayətkarlıqla Mübarizə İdarəsinin əməkdaşları əməliyyat məlumatı əsasında onu ayın 22-də saat 10 radələrində metronun Nəriman Nərimanov stansiyasının yaxınlığında, Aşıq Molla Cümə küçəsində şübhəli şəxs qismində saxlayıblar. İttihama görə, o, şöbəyə gətirilib və ona baxış zamanı şalvarının cibindən 6,4 qram heroin aşkar edilib.
1990-cı il təvəllüdlü Coşqun Musayev məhkəmədə bildirib ki, həbsinə səbəb Söyüdlü aksiyaları zamanı qaldırılan plakatları onun hazırlamasıdır. Ona görə də onu narkotiklə şərləyərək cəzalandırdılar. Coşqun Musayev bu zalım hakimiyyətin şərrinin qurbanı və 3 il həbsxanada işgəncələrə məruz qalacaq başqa bir şəxsdir. İlham Əliyev hökuməti həqiqəti deyən etirazçıları, hakimiyyətə qarşı öz hüquqlarını müdafiə edənləri amansızlıqla həbs etmək qərarına gəlib. Azərbaycan xalqı bu insanı dəstəkləməlidir. Bu gün yüzlərlə gənc bu qondarma ittihamlarla həbsxanada canlarını çürüdür. Biz bütün siyasi məhbuslara azadlıq tələb edirik.
Rəsul Ə.
Comments
Post a Comment