Tofiq Yaqublu artıq 37 gündür ki, aclıq aksiyasındadır

65 yaşlı Tofiq Yaqublu artıq 37 gündür ki, aclıq aksiyasındadır. İlham Əliyev isə ona qarşı sərgilədiyi qərəzli mövqedə israrlı davranmağa davam edir. Bakı Apellyasiya Məhkəməsi artıq onun verdiyi apellyasiya şikayətinə ilkin baxışı həyata keçirib. Halbuki bu məhkəmə, Tofiq bəyi ev dustaqlığına buraxmaqla onun bir mülki xəstəxanada müalicəsini təmin edə bilərdi. Lakin bu baş vermədi – aclığın 36-cı günündə olan bir insanı evə buraxmaq əvəzinə, onu həbsdə saxladılar.

Qızı Nigar Həzi bu qərarı belə qiymətləndirir: “Bu, Tofiq Yaqublunun ölümünə fərman verildiyini göstərir”. "Mən nə edə bilərəm ki?" deyərək kənara çəkilmək vicdana sığmaz. Ölümün ayaq səslərini duyduğunu bildirən Tofiq Yaqublu, hər gün ölüm xəbərini alma ehtimalı ilə üz-üzədir. O, bu ölkənin və xalqın haqq-ədalət uğrunda mübarizəsinə rəhbərlik edən simalardan biridir. Heç bir cinayət törətmədiyi halda ölümlə üzbəüz saxlanılması isə, Əliyev rejiminin xalqın iradəsinə və hüquq normalarına qarşı olan münasibətini açıq şəkildə göstərir.

Bu rejim yalnız onu həbsdə saxlamaqla kifayətlənmir – eyni zamanda, Yaqublunu inandığı və güvəndiyi həkimlərdən də uzaq salaraq onun sağlamlıq durumunu daha da ağırlaşdırır. Artıq Tofiq bəy müstəqil hərəkət edə bilmir, danışmaqda çətinlik çəkir, su içmək belə mümkün deyil.

Mayın 7-də vəkil Fəxrəddin Mehdiyev Ədliyyə Nazirliyinin müalicə müəssisəsində onunla görüşdü və vəziyyəti belə təsvir etdi:

“Tofiq Yaqublu artıq su da qəbul edə bilmir. Deməsinə görə, içdiyi suyu qaytarır. Özü, demək olar, hərəkət edə bilmir. Danışığı ləngiyib. Gözlərində zəiflik var. Mədə ağrılarından çox şikayət edir. Baş gicəllənmələrindən şikayət edir. Çəkisində sürətli itki var, 76 kiloqram 200 qrama düşüb” (aclığa başladığında çəkisi 95.6 kq idi).

Vəkil F.Mehdiyev bildirir ki, vəziyyət olduqca kritikdir və təcili tibbi müdaxilə zəruridir:

“Yaxşı olardı ki, həkim Adil Qeybulla yenə ona baş çəksin. Mən vəziyyətin ağırlığına görə ondan xahiş etdim ki, aclıq aksiyasını dayandırsın, amma qəti şəkildə bildirdi ki, aclığı davam etdirəcək... Ağır təəssüratlardır, mənimlə vidalaşanda dedi ki, 'ölümün səslərini eşidirəm'...”

Əliyev hakimiyyəti Tofiq Yaqublunun həyatının məsuliyyətini dərk etməli və onu dərhal azad etməlidir.

Rəsul Ə.